ज्येष्ठ काँग्रेस नेते व माजी केंद्रीय मंत्री सुरेश कलमाडी यांचे पुण्यात निधन

ज्येष्ठ काँग्रेस नेते व माजी केंद्रीय मंत्री सुरेश कलमाडी यांचे पुण्यात दीर्घ आजाराने निधन झाले. ते ८१ वर्षांचे होते. राजकीय व क्रीडा क्षेत्रात त्यांनी महत्त्वाची भूमिका बजावली होती.

पुणे |

ज्येष्ठ काँग्रेस नेते, माजी केंद्रीय मंत्री तसेच भारतीय ऑलिम्पिक महासंघाचे माजी अध्यक्ष सुरेश कलमाडी यांचे मंगळवारी पहाटे पुण्यात निधन झाले. ते ८१ वर्षांचे होते. गेल्या काही काळापासून ते दीर्घ आजाराने त्रस्त होते आणि त्यांच्यावर दीनानाथ मंगेशकर रुग्णालयात उपचार सुरू होते.

मंगळवारी पहाटे ३.३० वाजताच्या सुमारास उपचारादरम्यान त्यांची प्राणज्योत मालवली. सुरेश कलमाडी यांच्या कार्यालयाच्या हवाल्याने ही माहिती समोर आली आहे. त्यांच्या निधनाने पुण्याच्या राजकीय व सामाजिक वर्तुळात शोककळा पसरली आहे.

सुरेश कलमाडी हे पुण्यातून अनेक वेळा खासदार म्हणून निवडून आले होते. त्यांनी आपल्या राजकीय कारकिर्दीत केंद्र सरकारमध्ये रेल्वे राज्यमंत्री म्हणूनही जबाबदारी सांभाळली होती. याशिवाय, भारतीय ऑलिम्पिक महासंघाचे अध्यक्षपद भूषवणाऱ्या मोजक्या नेत्यांमध्ये त्यांचा समावेश होता.

त्यांचे पार्थिव एरंडवणे येथील त्यांच्या निवासस्थानी ‘कलमाडी हाऊस’ येथे दुपारी दोन वाजेपर्यंत अंत्यदर्शनासाठी ठेवण्यात येणार आहे. त्यानंतर सायंकाळी साडेतीनच्या सुमारास नवी पेठ येथील स्मशानभूमीत त्यांच्यावर अंत्यसंस्कार केले जाणार आहेत.

पायलट ते राजकारणी असा प्रवास

राजकारणात येण्यापूर्वी सुरेश कलमाडी यांनी १९६४ ते १९७२ या कालावधीत भारतीय हवाई दलात पायलट म्हणून सेवा बजावली होती. सेवेतून निवृत्त झाल्यानंतर त्यांनी सामाजिक कार्यातून राजकारणात प्रवेश केला. पुढे त्यांनी पुण्याच्या राजकारणावर दीर्घकाळ प्रभाव ठेवला.

वाद आणि क्रीडा क्षेत्रातील भूमिका

२०१० साली दिल्लीत झालेल्या राष्ट्रकुल क्रीडा स्पर्धांदरम्यान त्यांच्यावर भ्रष्टाचाराचे गंभीर आरोप झाले होते. एप्रिल २०११ मध्ये त्यांना दोषी ठरवण्यात आले होते. मात्र, त्यानंतरही क्रीडा संघटनांमध्ये त्यांचा प्रभाव काही प्रमाणात कायम राहिला.

२०१६ मध्ये त्यांना भारतीय ऑलिम्पिक महासंघाच्या पॅनलचे आजीवन अध्यक्षपद देण्यात आले होते, मात्र त्यांनी ही जबाबदारी स्वीकारण्यास नकार दिला होता.

सुरेश कलमाडी यांच्या पश्चात पत्नी, मुलगा, सून, दोन मुली, जावई आणि नातवंडे असा मोठा परिवार आहे.