पुणे हादरले: हिंजेवाडीतील TCS कार्यालयात 24 वर्षीय IT इंजिनिअरने आत्महत्या केल्याची धक्कादायक घटना

पुण्यातील हिंजेवाडी येथील TCS कंपनीच्या कार्यालयात 24 वर्षीय आयटी इंजिनिअरने आत्महत्या केल्याची घटना समोर आली असून, पिंपरी चिंचवड पोलिसांकडून पुढील तपास सुरू आहे.

Pune | TCS Techie Suicide Case:
पुण्यातील हिंजेवाडी आयटी पार्कमध्ये मंगळवारी रात्री एक धक्कादायक घटना घडली आहे. टाटा कन्सलटन्सी सर्व्हिसेस (TCS) कंपनीच्या कार्यालयातील प्रसाधनगृहात एका 24 वर्षीय आयटी इंजिनिअरने आत्महत्या केल्याचे उघडकीस आले आहे.

पिंपरी चिंचवड पोलिसांनी दिलेल्या माहितीनुसार, मृत तरुणाचे नाव सुजल विनोद ओस्वाल (वय 24) असून तो वानवडी परिसरातील रहिवासी होता. ही घटना हिंजेवाडी आयटी पार्कच्या फेज 3 मधील TCS कार्यालयात रात्री सुमारे 12.30 वाजण्याच्या सुमारास घडली.

हिंजेवाडी पोलीस ठाण्याच्या अधिकाऱ्यांनी सांगितले की, कार्यालयातील सुरक्षा कर्मचारी रात्री नियमित गस्त घालत असताना प्रसाधनगृहात एक तरुण बेशुद्ध अवस्थेत आढळून आला. तातडीने वरिष्ठांना माहिती देण्यात आली आणि पोलिसांना घटनास्थळी पाचारण करण्यात आले. तपासात तो मृत असल्याचे निष्पन्न झाले.

प्राथमिक चौकशीत असे समोर आले आहे की, संबंधित तरुण आर्थिक तणावाखाली होता. पोलिसांच्या माहितीनुसार, तो ऑनलाइन बेटिंगमध्ये अडकला होता आणि त्यामध्ये झालेल्या नुकसानीमुळे मानसिक दबावाखाली होता. आत्महत्येपूर्वी त्याने आपल्या कुटुंबियांना एक संदेशही पाठवला असल्याची माहिती पोलिसांनी दिली आहे.

पोलीस उपायुक्त विशाल गायकवाड यांनी सांगितले की, मृतदेहाचे शवविच्छेदन करण्यात आले असून घटनेचा प्राथमिक अहवाल तयार केला जात आहे. या प्रकरणी कंपनीतील अधिकारी, सहकारी आणि नातेवाईकांचे जबाब नोंदवले जात असून पुढील तपास सुरू आहे.

दरम्यान, या घटनेबाबत प्रतिक्रिया जाणून घेण्यासाठी एका वृत्तसंस्थेने TCS शी संपर्क साधला असता, कंपनीकडून कोणताही अधिकृत प्रतिसाद देण्यात आलेला नाही.

टीप: मानसिक तणाव किंवा अडचणींचा सामना करत असाल, तर मदतीसाठी तज्ज्ञांशी किंवा हेल्पलाईनशी संपर्क साधणे महत्त्वाचे आहे.