IND vs NZ ODI: कॉनवे-निकोल्सची धडाकेबाज सलामी; भारतात 27 वर्षांनंतर न्यूझीलंडचा ऐतिहासिक विक्रम

IND vs NZ ODI सामन्यात न्यूझीलंडच्या कॉनवे आणि हेन्री निकोल्स यांनी 117 धावांची सलामी देत भारतात 27 वर्षांनंतर मोठा विक्रम केला. वडोदऱ्यातील सामन्यात भारतीय गोलंदाजांची कसोटी.

बडोदा : भारत आणि न्यूझीलंड यांच्यात सुरू झालेल्या एकदिवसीय मालिकेतील पहिल्या सामन्यात न्यूझीलंडच्या सलामी जोडीने भारतीय भूमीवर इतिहास रचला आहे. डेव्हन कॉनवे आणि हेन्री निकोल्स यांनी दमदार फलंदाजी करत भारतीय गोलंदाजांना सुरुवातीला निष्प्रभ ठरवत 27 वर्षांनंतर मोठा विक्रम आपल्या नावावर केला.

भारताने नाणेफेक जिंकून प्रथम गोलंदाजीचा निर्णय घेतला होता. मात्र, मैदानात उतरलेल्या कॉनवे-निकोल्स जोडीने संयमी पण आक्रमक खेळाचे उत्तम उदाहरण सादर केले. दोघांनी मिळून पहिल्या विकेटसाठी 117 धावांची भक्कम भागीदारी करत न्यूझीलंडला भक्कम सुरुवात करून दिली.

27 वर्षांनंतर तुटला जुना विक्रम

भारतीय भूमीवर न्यूझीलंडच्या सलामी जोडीकडून झालेली ही दुसऱ्या क्रमांकाची सर्वोच्च भागीदारी ठरली आहे. याआधी 1999 मध्ये राजकोट येथे नाथन अॅस्टल आणि क्रेग स्पीयरमॅन यांनी भारताविरुद्ध 115 धावांची सलामी दिली होती. कॉनवे आणि निकोल्स यांनी हा 27 वर्षे जुना विक्रम मागे टाकला.

न्यूझीलंडसाठी भारतात सर्वोच्च सलामी भागीदारीचा विक्रम अद्यापही अँड्र्यू जोन्स आणि जॉन राईट (140 धावा, 1988) यांच्या नावावर कायम आहे.

पहिल्या टप्प्यात न्यूझीलंडचा दबदबा

सामन्याच्या पहिल्या 10 षटकांत न्यूझीलंडने कोणतीही विकेट न गमावता 49 धावा केल्या. त्यानंतर पुढील षटकांमध्ये दोन्ही फलंदाजांनी धावगती वाढवत आपापली अर्धशतके पूर्ण केली आणि संघाचा स्कोअर शंभरच्या पुढे नेला.

हर्षित राणाने दिला भारताला दिलासा

न्यूझीलंडची ही सलामी जोडी मोठा विक्रम करेल असे वाटत असतानाच, युवा वेगवान गोलंदाज हर्षित राणा भारताच्या मदतीला धावून आला. 22 व्या षटकात हर्षितने हेन्री निकोल्स (62 धावा) यांना बाद करत ही धोकादायक भागीदारी फोडली आणि भारताला पहिले यश मिळवून दिले.

दोन्ही संघांची Playing XI

भारत :
शुभमन गिल (कर्णधार), रोहित शर्मा, विराट कोहली, केएल राहुल (यष्टीरक्षक), श्रेयस अय्यर (उपकर्णधार), रवींद्र जडेजा, नितीश कुमार रेड्डी, हर्षित राणा, कुलदीप यादव, मोहम्मद सिराज, अर्शदीप सिंग.

न्यूझीलंड :
डेव्हन कॉनवे (यष्टीरक्षक), विल यंग, हेन्री निकोल्स, डॅरिल मिचेल, ग्लेन फिलिप्स, मायकल ब्रेसवेल (कर्णधार), जोश क्लार्कसन, क्रिस्टियन क्लार्क, काईल जेमीसन, आदित्य अशोक, मायकल राय.