पुण्यात खळबळ! विक्रीसाठी आणलेली ४ गावठी पिस्टल जप्त; खंडणी विरोधी पथकाची धडक कारवाई, एक जण जेरबंद…

​पुणे (सुनित जैनजांगडे): पुणे शहरात बेकायदेशीर शस्त्र बाळगणाऱ्या आणि विक्री करणाऱ्या तस्करांवर गुन्हे शाखेने मोठी कारवाई केली आहे. खंडणी विरोधी पथक १ ने नन्हे परिसरामध्ये सापळा रचून तब्बल ४ गावठी पिस्टल आणि जिवंत काडतुसांसह एका आरोपीला बेड्या ठोकल्या आहेत. या प्रकरणी नन्हे पोलीस ठाण्यात गुन्हा दाखल करण्यात आला आहे.

​कारवाईची पार्श्वभूमी आणि गोपनिय माहिती

​पुणे शहर आयुक्तालयात विनापरवाना शस्त्र बाळगणारे, रेकॉर्डवरील पाहिजे, फरारी व तडीपार आरोपींचा शोध घेऊन कठोर कारवाई करण्याचे आदेश वरिष्ठ अधिकाऱ्यांनी दिले होते.

​याच पार्श्वभूमीवर दिनांक २७ जुलै रोजी खंडणी विरोधी पथक १ चे सहा पोलीस निरीक्षक प्रसन्न जऱ्हाड व पथक गस्तीवर होते. यादरम्यान पोलीस अंमलदार सचिन माळवे, सोमनाथ कांबळे आणि दयानंद तेलंगे यांना गुप्त बातमीदाराद्वारे माहिती मिळाली की, गोकुळनगर, नन्हे पुणे भागात एक इसम बेकायदेशीर पिस्टल विक्रीसाठी आला असून त्याच्याकडे ३ ते ४ पिस्टल आहेत.

​ही माहिती मिळताच वरिष्ठ पोलीस निरीक्षक महेश सागडे यांनी तातडीने खात्री करून कारवाई करण्याचे आदेश दिले.

​शिताफीने सापळा रचून आरोपी अटकेत

​दिलेल्या मार्गदर्शनाखाली पोलिसांनी गोकुळनगर, नन्हे, पुणे परिसरातून भुषण उत्तम मोहिते (वय २३ वर्षे, रा. ओम साई ऑर्चिड, फ्लॅट नं. १०६, धायरी पोकळे वस्ती, पुणे) याला ताब्यात घेतले. त्याची अंगझडती घेतली असता त्याच्याकडे खालीलप्रमाणे मुद्देमाल आढळून आला:

• ​४ गावठी पिस्टल
• ​३ जिवंत काडतुसे (मॅगझीनमध्ये)
• ​एकूण जप्त मुद्देमाल: २,००,६००/- रुपये मूल्य

​तपासणी दरम्यान आरोपी भुषण मोहिते याने हे पिस्टल महेश कांबळे (रा. गुजरवाडी, पुणे) याच्याकडून विक्रीसाठी आणल्याची माहिती दिली.

​गुन्ह्याची नोंद व पुढील तपास

​सदर प्रकरणी आरोपीविरुद्ध नन्हे पोलीस स्टेशन येथे गु.र.नं. १९४/२०२६ नुसार आर्म अॅक्ट कलम ३ (२५), ५ (१) (अ) सह कलम २५ (१) (अ), महाराष्ट्र पोलीस कायदा कलम ३७ (१) (३) सह १३५ अन्वये गुन्हा दाखल करण्यात आला आहे. नन्हे पोलीस स्टेशन या प्रकरणाचा पुढील तपास करत आहेत.

​यशस्वी कारवाई करणारी पोलीस टीम

​सदरची धडक कारवाई खालील अधिकाऱ्यांच्या मार्गदर्शनाखाली पार पडली:

• ​मार्गदर्शन: मा. अपर पोलीस आयुक्त (गुन्हे) श्री. तेजस्वी सातपुते, मा. पोलीस उप आयुक्त (गुन्हे) श्री. गौहर हसन, मा. सहायक पोलीस आयुक्त (गुन्हे) श्री. शैलेश संखे.
• ​प्रमुख अधिकारी: खंडणी विरोधी पथक १ चे वरिष्ठ पोलीस निरीक्षक श्री. महेश सागडे आणि सहा. पोलीस निरीक्षक प्रसन्न जऱ्हाड.
• ​अंमलदार टीम: रणजित फडतरे, रहिम शेख, सोमनाथ कांबळे, बाबासाहेब दांगडे, दयानंद तेलंगे पाटील, सचिन माळवे, प्रमोद पवार, किरण मोरे आणि सुहास जगताप.