पुण्यात गुन्हे शाखेची धडक कारवाई; नऱ्हे परिसरातून पावणेदोन लाखांचा प्रतिबंधित गुटखा जप्त, एकाला बेड्या…

​पुणे ( सुनित जैनजांगडे ): पुणे शहरातून बेकायदेशीर व अवैध धंद्यांचे समूळ उच्चाटन करण्यासाठी मा. पोलीस आयुक्त, पुणे शहर यांनी दिलेल्या विशेष आदेशानुसार गुन्हे शाखेच्या अंमली पदार्थ विरोधी पथक १ ने मोठी यशस्वी कारवाई केली आहे. नऱ्हे-आंबेगाव परिसरात सापळा रचून कारवाई करत १,८६,४९४ रुपये किमतीचा महाराष्ट्र शासनाने प्रतिबंधित केलेला गुटखा व सुगंधित तंबाखू जप्त करण्यात आला असून एका आरोपीला बेड्या ठोकल्या आहेत.

​सुरेश संतोष पुरी (वय ३४, रा. फ्लॅट नं. १०१, पहिला मजला, पॅराडाईज अपार्टमेंट, नऱ्हे-आंबेगाव, पुणे) असे अटक करण्यात आलेल्या आरोपीचे नाव आहे.

​गोपनीय बातमीदाराच्या खबरीवरून छापा

​दिनांक २० जुलै २०२६ रोजी अंमली पदार्थ विरोधी पथक १ चे वरिष्ठ पोलीस निरीक्षक, सहाय्यक पोलीस निरीक्षक व पोलीस अंमलदार नऱ्हे-आंबेगाव परिसरात गस्त घालत होते. गस्तीदरम्यान पोलीस उप-निरीक्षक कोतकर यांना त्यांच्या विश्वसनीय गोपनीय बातमीदाराकडून पक्की बातमी मिळाली की, पॅराडाईज अपार्टमेंटमधील फ्लॅट क्र. १०१ मध्ये राहणारा सुरेश पुरी हा मोठ्या प्रमाणात प्रतिबंधित गुटखा विक्रीसाठी साठवून ठेवणार आहे.

​बातमीची शहानिशा करून पोलीस पथकाने तात्काळ नमूद ठिकाणी जाऊन घेराबंदी करत धाड टाकली. तेथे सुरेश पुरी याला ताब्यात घेऊन फ्लॅटची कसून पाहणी केली असता, महाराष्ट्र शासनाने बंदी घातलेला विविध कंपन्यांचा गुटखा व सुगंधित तंबाखूचा मोठा साठा हस्तगत करण्यात आला.

​जप्त केलेला साठा व मुद्देमाल

​पोलीस कारवाईत खालील कंपन्यांचा तंबाखूजन्य व प्रतिबंधित साठा जप्त करण्यात आला आहे:

• ​विमल पान मसाला
• ​आर.एम.डी. (RMD)
• ​राज निवास पान मसाला
• ​रजनीगंधा
• ​सुगंधित पान मसाला व जाफरानी जर्दा
• ​एकूण जप्त मुद्देमाल: ₹१,८६,४९४/-

​अनेक कलमांतर्गत गुन्हा नोंद

​या संपूर्ण कारवाईबाबत नऱ्हे पोलीस ठाणे येथे गु.र.नं. १७८/२०२६ अन्वये गुन्हा नोंद करण्यात आला आहे. यामध्ये:

• ​भारतीय न्याय संहिता (BNS): कलम १२३, २२३, २७४, २७५
• ​सिगारेट व अन्य तंबाखूजन्य उत्पादने (COTPA) अधिनियम: कलम ७ (२) व २० (२)
• ​अन्न सुरक्षा व मानके अधिनियम: कलम २६ (२) (i) (iv) चे उल्लंघन केल्याने कलम ५९

​या कलमांचा समावेश असून, गुन्हे शाखेच्या या धडक कारवाईमुळे पुणे शहरात अवैध गुटखा पुरवणारी मोठी साखळी मोडण्यात यश आले आहे.

​पोलीस पथक व मार्गदर्शन

​ही कारवाई मा. अपर पोलीस आयुक्त (गुन्हे) श्रीमती तेजस्वी सातपुते, मा. पोलीस उप-आयुक्त (गुन्हे) श्री. गौहर हसन, आणि मा. सहाय्यक पोलीस आयुक्त (गुन्हे ३) श्री. शंकर खटके यांच्या मार्गदर्शनाखाली पार पडली.

​कारवाईत अंमली पदार्थ विरोधी पथक १ चे वरिष्ठ पोलीस निरीक्षक तृप्ती सोनावणे, सहाय्यक पोलीस निरीक्षक अनिल सुरवसे, पोलीस उप-निरीक्षक कोतकर तसेच पोलीस अंमलदार आशा भिंगारे, विठ्ठल साळुंखे, अमरनाथ लोणकर, संजय राजे, अमोल सरडे, निलेश जाधव, विशाल भिलारे, निशिकांत सावंत, तुषार साळुंके, अतेल क्षिरसागर, सचिन लोहार आणि मंगेश गुंड यांनी महत्त्वपूर्ण कामगिरी बजावली.