फर्स्ट एसी केबिनला ‘हनीमून सेट’चा साज; व्हिडिओ व्हायरल होताच TTE निलंबित, रेल्वेची चौकशी सुरू…

नवी दिल्ली | प्रतिनिधी

भारतीय रेल्वेच्या फर्स्ट एसी केबिनला नवविवाहित जोडप्यासाठी हॉटेलमधील ‘हनीमून सूट’प्रमाणे सजवण्यात आल्याचा व्हिडिओ सोशल मीडियावर मोठ्या प्रमाणात व्हायरल झाला आहे. या प्रकरणाची गंभीर दखल घेत दक्षिण मध्य रेल्वेने (South Central Railway) संबंधित तिकीट तपासनीस (TTE) यांना निलंबित करत विभागीय चौकशीचे आदेश दिले आहेत.

व्हायरल झालेल्या व्हिडिओमध्ये फर्स्ट एसी कूपेमध्ये फुगे, फुलांची सजावट, गुलाबाच्या पाकळ्या आणि ‘I Love You’ असा संदेश दिसत आहे. ही घटना मुंबई CSMT–बल्हारशाह–नांदेडग्राम (नांदिग्राम) एक्स्प्रेसमध्ये घडल्याचे रेल्वे प्रशासनाने स्पष्ट केले आहे. प्राथमिक माहितीनुसार, नवविवाहित जोडप्याने खासगी डेकोरेशन एजन्सीची सेवा घेतली होती. संबंधित डेकोरेटरने परवानगीशिवाय रेल्वेच्या एसी डब्यात प्रवेश करून सजावट केल्याचा आरोप आहे.

रेल्वे प्रशासनाने या प्रकाराला सुरक्षा नियमांचे उल्लंघन आणि गंभीर निष्काळजीपणा मानले आहे. चौकशीदरम्यान बाहेरील व्यक्तींना रेल्वेच्या आरक्षित डब्यात प्रवेश कसा मिळाला, याचा तपास केला जाणार आहे. संबंधित TTE यांना चौकशी पूर्ण होईपर्यंत निलंबित करण्यात आले असून, डेकोरेटरविरुद्धही रेल्वे कायद्यानुसार कारवाईची प्रक्रिया सुरू करण्यात आली आहे.

या व्हिडिओनंतर सोशल मीडियावर संमिश्र प्रतिक्रिया उमटल्या आहेत. काहींनी या कल्पकतेचे कौतुक केले, तर अनेकांनी सार्वजनिक वाहतुकीतील सुरक्षा, नियमांचे पालन आणि रेल्वे कर्मचाऱ्यांच्या जबाबदारीबाबत प्रश्न उपस्थित केले आहेत.