​गुन्हे शाखा युनिट २ची मोठी कारवाई: खुनाचा प्रयत्न व १७ गंभीर गुन्हे असलेला कुप्रसिद्ध फरार आरोपी ‘पॅडी’ जेरबंद!

​पुणे: पुणे शहर पोलिसांच्या गुन्हे शाखा युनिट २ ने एक मोठी यशस्वी कारवाई करत मांजरी पोलीस ठाण्याच्या हद्दीतील आर्म्स ॲक्ट (शस्त्र कायदा) गुन्ह्यात फरार असलेल्या आणि रेकॉर्डवरील एका सराईत गुन्हेगाराला बेड्या ठोकल्या आहेत. प्रथम ऊर्फ पॅडी सुरेश म्हस्के (वय २२ वर्षे, रा. पर्वती पायथा, सिंहगड रोड, पुणे) असे अटक करण्यात आलेल्या आरोपीचे नाव आहे. आरोपीवर खुनाचा प्रयत्न करण्यासह शरीराविरुद्धचे तब्बल १७ हून अधिक गंभीर गुन्हे दाखल आहेत.

​निलायम टॉकीज परिसरात घातला सापळा

​गुन्हे शाखा युनिट २ चे पथक हद्दीमध्ये गुन्हे प्रतिबंधक गस्त घालत असताना आणि फरार आरोपींचा शोध घेत असताना, पोलीस अंमलदार संदीप शिर्के यांना एका विश्वासू बातमीदाराकडून महत्त्वाची माहिती मिळाली. मांजरी पोलीस स्टेशन येथील शस्त्र अधिनियमाच्या गुन्ह्यात (गु.र.नं २६/२०२६) पाहिजे असलेला फरार आरोपी ‘पॅडी म्हस्के’ हा पर्वती परिसरातील निलायम टॉकीजजवळ फिरत असल्याची खात्रीशीर माहिती पोलिसांना मिळाली होती.

​पोलिसांची तत्परता आणि अटक

​या माहितीची गांभीर्याने दखल घेत गुन्हे शाखा युनिट २ चे प्रभारी वरिष्ठ पोलीस निरीक्षक राहुल खिलारे यांनी तात्काळ कायदेशीर कारवाईचे आदेश दिले. त्यानुसार महिला पोलीस उपनिरीक्षक तेजश्री पवार आणि त्यांच्या पथकाने निलायम टॉकीज परिसरात सापळा रचून संशयित आरोपीला ताब्यात घेतले. आरोपीची कसून चौकशी केली असता त्याने आपले नाव प्रथम ऊर्फ पॅडी म्हस्के असल्याचे कबूल केले. मांजरी पोलीस ठाण्याशी संपर्क साधून खात्री केल्यानंतर तो पोलिसांना हवा असलेलाच आरोपी असल्याचे निष्पन्न झाले, ज्यानंतर त्याला मांजरी पोलिसांच्या ताब्यात देण्यात आले आहे.

​अनेक गंभीर गुन्ह्यांची नोंद

​अटक करण्यात आलेला पॅडी म्हस्के हा पोलिसांच्या दप्तरी असलेला रेकॉर्डवरील सराईत गुन्हेगार आहे. त्याच्यावर केवळ अवैध शस्त्र बाळगणेच नव्हे, तर खुनाचा प्रयत्न करणे आणि गंभीर दुखापत करण्यासारखे शरीराविरुद्धचे १७ पेक्षा जास्त गुन्हे यापूर्वीच नोंदवले गेले आहेत. त्याच्या अटकेमुळे अनेक गुन्ह्यांची उकल होण्याची शक्यता वर्तवली जात आहे.

​या पथकाने केली कामगिरी:

सदरची यशस्वी कामगिरी अपर पोलीस आयुक्त (गुन्हे) श्रीमती तेजस्वी सातपुते, पोलीस उप आयुक्त (गुन्हे) श्री. गौहर हसन, आणि सहा. पोलीस आयुक्त श्री. शैलेश संखे यांच्या मार्गदर्शनाखाली वरिष्ठ पोलीस निरीक्षक राहुल खिलारे, पोलीस निरीक्षक अविनाश माने, मपोउपनि तेजश्री पवार, पोउपनि ज्ञानेश्वर दळवी, तसेच पोलीस अंमलदार संदीप शिर्के, विशाल दळवी, ऋषिकेश व्यवहारे, उज्वल मोकाशी आणि संपूर्ण युनिट २ च्या पथकाने केली आहे.